យើងនឹងអនុវត្តការងារជាមួយអង្គការ  និងស្ថាប័នផ្សេងៗដែលផ្តល់ជំនួយបច្ចេកទេសឆើ្លយតបទៅនឹងតម្រូវការ និងកម្មវិធីបណ្តុះបណ្តាលអាជីវកម្មដែលមានលក្ខណៈទៀងទាត់ មានគុណភាព និងមាននិរន្តរភាពយូរអង្វែង សម្រាប់​សហគ្រិនស្ត្រីវ័យក្មេង។​ យើងចាប់អារម្មណ៍លើផ្នែកបច្ចេកទេស ដែលរួមមានការគាំទ្រលើការរៀបចំ ផែនការអាជីវកម្ម ប្រកបដោយគុណភាព ក៏ដូចជា “ជំនាញទន់” (soft skills) ដើម្បីឲ្យស្រ្តីវ័យក្មេងទទួលបានទំនុកចិត្តដែលខ្លួនត្រូវ ការជាចាំបាច់ដើម្បីបន្តសម្រេចឲ្យបាននូវអ្វីដែលពួកគេបានជ្រើសរើសសម្រាប់ ជីវិតរបស់ពួកគេ៕

យើងនឹងធ្វើការជាមួយស្ថាប័នទាំងតូចទាំងធំ ដែលចូលរួមពាក់ព័ន្ធជាមួយនឹងអ្នកតាក់តែងគោលនយោបាយ ដើម្បីកសាងនូវបរិយាកាសធុរកិច្ច ឲ្យកាន់តែមានភាពងាយស្រួល ពោលគឺស្ថាប័នដែលផ្តល់លទ្ធភាព និងលើកទឹកចិត្តឲ្យស្រ្តីវ័យក្មេង អាចសម្រេចគោលដៅរបស់ពួកគេបានដោយជោគជ័យ។ យើងនឹងគាំទ្រដល់គំនិតផ្តួចផ្តើមនានា ដែលអាចជួយឲ្យរដ្ឋាភិបាល ដឹងពីចំណុចដែលខ្លួនអាចលើកកម្ពស់លើផ្នែកផ្តល់ព័ត៌មាន និងសេវាផ្សេងៗឲ្យកាន់តែមានភាពល្អប្រសើរ សម្រាប់ឆ្លើយតបចំពោះតម្រូវការរបស់សហគ្រិនស្ត្រីវ័យក្មេង។ ត្រង់ចំណុចនេះ យើងនឹងគាំទ្រដល់ភ្នាក់ងារផ្តល់សេវាផ្នែកច្បាប់ ដែលអាចធានាយ៉ាងណាឲ្យស្ត្រីយល់ដឹង និងស្របតាមបរិយាកាសផ្នែកច្បាប់ និងគតិយុត្តដែលមានលក្ខណៈស្មុគស្មាញ។

គោលការណ៍សំខាន់របស់យើងដែលកំពុងអនុវត្ត គឺការទទួលស្គាល់ថាស្រី្តវ័ក្មេងនៅកម្ពុជា កំពុងរស់នៅ ធ្វើការ និងមានក្តីសុបិននៅក្នុងសង្គមមួយដែលជាប់ដោយនិយាម និងការរំពឹងទុកពីក្រុមគ្រួសារ ដែលជាកត្តាដាក់កំហិតមិនឲ្យពួកគេអាចជ្រើសរើសរកវិថីជីវិតពិតប្រាកដ។ យើងនឹងខិតខំព្យាយាឆ្លើយតបចំពោះនិយាមសង្គមដ៏តឹងតែងបែបនេះតាមដែលអាចធ្វើទៅបាន។ សកម្មភាពឆ្លើយតបទាំងនេះរួមមានការជំរុញឲ្យក្រុមគ្រួសារផ្តល់ការគាំទ្រដល់ពួកគាត់និងការបង្ហាញឲ្យឃើញពីភាពជាគំរូក្នុងផ្លូវវិជ្ជមានដែលស្ត្រីអាចរៀនសូត្រតាម និងទទួលបានការលើកទឹកចិត្ត។